Matières
Ronn 65 Gemengepolitikerinnen a Gemengepolitiker hunn de Wee op déi 3. regional Reunioun vum SYVICOL op Biereng fonnt !
No deenen zwou éischte regionale Reuniounen zu Biergem an der Gemeng Monnerech an zu Maarnech an der Gemeng Clierf, hat de SYVICOL e Mëttwoch, den 19. Mäerz op Biereng an der Gemeng Miersch invitéiert.
Ënnert dem Slogan „Kommt schwätzt mat“ goung et dorëms zesumme mat den Deleguéen d’Uleiesse vun de Gemengen ze diskutéieren. Ronn 65 Gemengepolitikerinnen a Gemengepolitiker waren op der 3. regionaler Reunioun vum SYVICOL derbäi fir sech och doriwwer ze informéieren, wéi sech de SYVICOL fir si um kommunalen, nationalen an internationalen Niveau asetzt.
E wichtege Sujet, deen och zur Sprooch koum, ass de Volet Formatioun, wou de SYVICOL bekanntlech zënter Hierscht 2024 mat der Formation continue nei Weeër geet. „D’Gemengegesetz liicht gemaach“ – eng Publikatioun déi de gesetzleche Kader vun de Gemengen, an haaptsächlech d’ofgeännert Gemengegesetz vum 13. Dezember 1988, méi accessibel fir all d‘Gemengepolitikerinnen a Gemengepolitiker mécht – gouf an dem Kontext als een Element vun der Formation continue virgestallt.
Déi lescht Geleeënheet fir um SYVICOL senger Tournée duerch d’Gemengen deel ze huele gëtt et en Donneschden, de 27. Mäerz am „Centre culturel Machera“ zu Gréiwemaacher, wou och den Inneminister Léon Gloden wäert mat derbäi sinn.
Umelle kënnt Dir Iech ganz einfach a séier iwwer d'Gemengeplattform via QR-Code an der Invitatioun oder ënnert follgendem Link: https://www.syvicol.lu/fr/actualites/ficheactualites/2025-03-03/de-syvicol-kennt-bei-iech-kommt-schwatzt-mat
Matières